Pasian Kamsang dingin telkhiat ngahna
1. Khamtung gamah Tediim khua-in Khualian Khuathupi khat ahih hunsung, Kam Hau' gam Ukpipa kapu Khua Cin in, Gamuk maang-in a omhun laitak-in, Tediim khua-ah Nuam Dim kici numei khat a om hi.
2. Tua Nuam Dim in Khamtung mite' nuntaak nading kilah khiatna, ahun ahun-in Mang a muthei hi.
3. Tuabangin Nuam Dim tungah Mangmuhna tawh thu apia- vaanglianpa pen kua hiam? cih a thei kuamah a om naikei hi. Banghang hiam cih leh tua hun laitak-in Pu leh Pate in dawi vaanglian bek na um, na thei uh aa, vaanglian biakna a kineih ciangin "Ka khuhpi, ka phahpi, ka khuaziing, ka khuavaak, ka nipi, ka khapi, ka lungzai, ka aiikham na taii in" ci-in vaanglian minlawhna a nei uh hi.
4. Tuabang hunsung panin Nuam Dim tungah thu apia vaanglianpa in "Kei' min nong lawh uhciangin 'PASIAN' hong ci un" ci-in thu apia hi.
5. Vaanglian Pasian in Nuam Dim tungah thu pia aa, "Khamtung gamah apil aciim mi tampi om ahih hangin, Ka Thupha, Ka Thusiangtho a zeek a thangsak dingin Pau Cin Hau ka teel hi. Amaa tungtawn-in Ka Thupha zeekkhia ding kahih manin, hihthu Nuam Dim in na thangkhiasak kholding hi" ci-in thu apia hi.
6. Nuam Dim in hih Pasian' thupiakna a ngahciangin, Keimah Pau Cin Hau kiangah hongpai aa, hih Pasian' thupiakna bangin hong gen hi.
7. Tuahun laitak-in Khamtung gamah Laangvaa inn khatbeek a om naikei aa, Pu Khua Cin in Laangvaa inn deih-in, a neihtheih nading a vaihawm laitak ahi hi. Laangvaa khek nadingin Saaihaa tampitak Meitei gamah, a uksung mite puaksak ding asawm hi. Tua hun sungin Nuam Dim tungah Pasian in thu ki langhkhiasak aa, "Khua Cin in laangvaa inn deihkei hen; a sawm a tup tawpkikta hen; banghanghiam cihleh laangvaa inn adeih leh ata Hau Za Kham leh a nu Ciin Ngul ka lading aa, Tediim khua ka mangsak ding hi," ci-in thu apia hi.
8. Tua hunin Pasian' min kithei hinapi-in, Pasian' vaangliatna kuamah in thei nailo ahih manin, Pasian zahtaak ding leh Pasian' sawlna bang mangdingin mite in a ngaihsun thei naikei uh hi.
9. Nuam Dim in Pasian' hilhkholhna thute Khua Cin tungah a gen hi. Khua Cin in hihthu a zakciangin bangmah thu-in a sehloh thamlo-in, heh-ngawh pau aa, "Nuam Dim in a theih a heet tam hi; that unla, tuipi biakna- an lawhkhat ih sutna ciat dim apa Hau Zui pia un," a ci hi.
10. Pasian' sawlna bangin Nuam Dim in agen thute, Khua Cin in mangnuamlo thamloin, pausia ahihmanin, Pasian in diksalo-aa, Nuam Dim tungah thu a kilangh khiasak leuleu hi. Pasian' thupiakna-ah; "Kei-in, Khua Cin aa kipan, azawng ahau, mikhempeuh nuntaak nading ka hongbawl hi. Tua ahih ciangin ahoih apha ding deih aa ka vaihawm- Khua Cin in ka thu hong mangnuamlo aa hongnial ahih leh, ka ciamsa mahbangin ata Hau Za Kham leh anu Ciin Ngul kala ding hi. Tuaciangin Khua Cin ka inn-gamh sakding aa, Tediim Khua ka mangsak ding hi," ci-in Pasian in thu apia hi.
11. Hih Pasian' thupiakna azak atheih hangin, Khua Cin in mangnuam tuanlo aa, a uksung mite-laangvaa lei nading Saaihaa tampi puasak-in, Meitei gamah a paisak teitei hi. Tua bang aa Meitei gamah laangvaa leiding aa a paisak manin, a uksung mite in gimna- gentheihna tampi a thuak uh hi. Ahi zongin Khua Cin in atup asawm bangin taangtun' tuanlo aa, laangvaa dalkhat bek- Tediim khua a tung hi.
12. Pasian' ciamsa mahbangin a sawtlo-in Khua Cin' tapa Hau Za Kham a sii hi. Tua Hau Za Kham kivuihun a cin' maa-in, Pasian in Nuam Dim tungah thupia aa, "Tedim khua-ah Khua Cin a teenzawhding leh a teenzawhloh ding natheih nadingun, atuangdung dawhsuk dawhphei ka kuaitan ding hi. Ka kuaihtan leh Tediim khua a mangding aa, ka kuaihtan kei leh Tediim khua a mangkeiding hi," aci hi.
13. Tuaciangin Nuam Dim in, Keimah Pau Cin Hau tungah: "Pau Cin Hau aw, Pasian in Hau Za Kham kivui ni ciangin, Khua Cin' tuangdung dawhsuk dawhphei kuaitan ning, ci ahih manin, atuangdung tungah kuamah atuanloh
nadingin, alangkhetni-in mipite tungah hilh in," ci-in Pasian' thupiakna bang-a hilhkhol dingin honggen hi.
14. Nuam Dim tungtawn aa Pasian' hongsawlna mahbangin Kei-in kumtawm khangmoi lai kahih hangin, Pasian hong thupiaknate um kahihman-in, Pasian' hong sawlna thute-a langkhetni ciangin mipite tungah tangtak-in ka taangko khia hi. Khuapihte leh midangte tungah Pasian hong thupiakna bang- ka hilh kagen hangin kuamah in hong umlo aa, hongmang nuamlo thamlo-in, "Khua Cin' tuangdung zabo aa sah- Pasian ahi zongin kuaitanzo ngal kenteh," ci-in hong nialhon uh hi.
15. Misi kivui ni hun hongtun' ciangin Kei in Pasian' hong thupiak-na um ka hihmanin, a khaamna tuangdung tungah ka tuang ngamkei aa, a innkaa tauta ah ka tuang hi. Tua laitakin misii hong kipusuah aa, bikhalap nuai hongtung hi. Uksung aa thau omkhempeuh kilawn aa, kanpuak ging bangin puak zeizai-in a ging ziazua hi. Tua hun laitak-kekkia aa vanpimau tawh kibangin hongging aa, dawi siampite' phuisamna-lungpi zubeelte kiluupna mun ahi-tuangdung dawhsuk hong kitan takpi in, Pasian' thupiakna aumlo, amang nuamlo mi tampite leh zubeelte inn nuai-sialbuanciim lakah akiasuk uh hi.
16. Hihbangthu teng apian' zawh asawtlo, hunkhat ciangin gamdangmi-mikaangte-in Khamtung gam hongsim uhaa, Tediim khua-meitawh hal-in, Tediim khua mite-akim apaam khuate ah gaaltaai-in kilal khin ahihmanin, Pasian' gensa mahbangin Tediim khua amang hi.
17. Tuahunciangin Pu Khua Cin te innkuanzong, Tediim khua pan paikhia-in, Vaanglai khua-ah kumkhat a teensungun Pu Khua Cin' nu Ciin Ngul asii hi. Tua panin Tualzaang khua ah lal leuleu uh ahihmanin, Pi Ciin Ngul' luangpua-in, Tualzaang khua-ah a vui uhhi. Tualzaang khua-ah kumkhat a teen khitciangun Ngennung khua-ah lal leuleu aa, tua lai-ah Pu Khua Cin hongsii hi. Ngennung khua panin Pu Hau Cin Khup in Tonzaang khua-ah Pu' Khua Cin' luang pua in avui hi.
18. Tua hi aa, Pu Khua Cin in ta- pasal adang nei nawnlo ahihmanin, a sanggampa Hau Pum' tapa Hau Cin Khup in a gamhluah-in, Pasian' ciamsa mahbangin Khua Cin a inn-gamh ahi hi.